Mae Fflapogram yn driawd sy’n cynnwys Ann Matthews (llais a gitâr), Alan Holmes (gitâr) a Dewi Evans (allweddellau). Maen nhw’n perfformio deunydd o’u grwpiau blaenorol Fflaps, Ectogram a Rheinallt H Rowlands, er mewn ffurf wahanol iawn, yn bennaf oherwydd eu diffyg drymiwr.

Mae’r triawd yn gyfeillion ers 43 mlynedd, ers cyfarfod ar yr un pryd yn 1981 yn awyrgylch creadigol ffrwythlon Coleg Celf Bangor, pan anfonwyd y tri i ystafell yn nhŵr yr adeilad i dynnu llun yr hyn a welsant yno. Darganfu’r tri eu bod yn rhannu cariad at gerddoriaeth a daethant at ei gilydd i recordio rhai o ganeuon Dewi o dan ei lysenw ‘Casio Kid’. Aeth Ann ac Alan ymlaen wedyn i ffurfio Fflaps ac yn ddiweddarach Ectogram, a byddai Dewi yn westai achlysurol, cyn iddo canolbwyntio ar recordio a pherfformio gyda’r diweddar Owain ‘Oz’ Wright fel Rheinallt H Rowlands.

Mae’r tri wedi aros yn ffrindiau agos. Mae marwolaeth ddiweddar Emyr Glyn Williams, a fu’n gymorth mawr ac yn ysbrydoliaeth i bawb ar y sîn Gymraeg, wedi eu sparduno i berfformio nifer o’r caneuon a ryddhaodd Em ar ei labeli recordio Ankst, Atol ac Ankstmusik … nid mewn ffordd dryw i’r gwreiddiol, gan y byddai wedi casáu hynny, ond i’w hail-greu gydag ysbrydion Jonny Evans, Maeyc Hewitt ac Oz Wright.